Дидар

                                                               “Саргара жортсоң, кызара бөртөсүң!..”

                                                                  Кыргызда ушундай айтым бар.

                                                                  Кол чапкын жабыла, досторум,

                                                                 Анткени, өзүңдүн сайтың бар!!!

                                                                                         А. Абылкасымов

         Биздин мектеп-Аксы районундагы Бозбу тоосунун өңүрүндө жайгашкан. №11 Т. Мавлянов атындагы жалпы билим берүүчү орто мектеп. Мектепте 70тен ашык мугалим эмгектенип, 1100 жакын  окуучу билим жана тарбия алышат. Мугалимдердин 17си "Эл агартуунун отличниктери", 29 жогорку категориядагы, 15 мугалим 1-категориядагы, 8 мугалим 2- категориядагылар болуп саналат. Мектепте окуу Мамлекеттик тилде-кыргыз тилинде жүргүзүлөт. Мектептин имараты 1970-жылы пайдаланууга берилген. Анда 22 предметтик бөлмө бар. Алар учурдун талабына ылайык жабдылган. Мектепте 50 орунга ылайыкташтырылган ашакана иштейт.

   Адабий көркөм чыгармачылыкка шыктуу окуучулардын чыгармачылыгын өстүрүү максатында "Тамчы" аттуу адабий көркөм ийрим уюшулган. Анда ай сайын чыгуучу "Тамчы" аттуу дубал гезит ийримдин мүчөлөрүнүн чыгармаларын өз бетинде жарыялап турат. Ал эми жылына бир жолу ошол ийримдин катышуучуларынын ырлары, аңгемелери, драмалык чыгармаларынан түзүлгөн китеп чыгаруу иши салтка айланган. Азыркы күндө мектептин мугалимдеринин, окуучуларынын адабий көркөм чыгармалары (ырлар, аңгемелер, чакан сценкалар) кирген "Тамчы" (2007-жыл), "Темир канат" (2008-жыл), "Шоола" (2009-жыл) аттуу китептерди мектептин китепканасынан алып окусаңыз болот. Андан башка  музыка жана орус тили, адабияты мугалимдери С. Түгөлбаев менен Г. Уметалиева "Кош жылдыз" (ырлар. 2008-жыл), мектептин 2008-жылдагы бүтүрүүчүсү Д. Шамшидин кызы "Кыз кыялы" (ырлар. 2008-жыл). кыргыз тили жана адабияты мугалими, "Жылдын мугалими-2008" кароо-сынагынын райондук турунун жеңүүчүсү Ч. Анарбаева "Сизге белек" (ырлар жана аңгемелер. 2008-жыл), мектептин директору Т. Болушованын "Издеп келем" (аңгемелер. 2009), мектептин 2009-жылдагы  бүтүрүүчүсү А. Абдихалил кызы "Кыздын сыры" ( ырлар. 2009-жыл) китептери да ушул жердеги "Менбас" тан жарык көргөн.

  Андан башка "Интернет-клуб" жана фотостудия бар. Тигүүчүлүк, кулинария боюнча атайын ийримдерде кыздар өз устаттыктарын өстүрүшөт.